အောက်တိုဘာ(၂၃)၊၂၀၁၆
လွှတ်တော်ကိုယ်စားလှယ်အဖြစ်မှ ရုပ်သိမ်းသည့်ဥပဒေကို ယခုအချိန်တွင် ပြဋ္ဌာန်းသင့်ပြီဖြစ်ကြောင်း မြန်မာ့နိုင်ငံရေးလေ့လာသုံးသပ်သူနှင့် လွှတ်တော်ကိုယ်စားလှယ်အချို့က ယနေ့ (အောက်တိုဘာလ ၂၃)ရက်တွင် ပြောဆိုလိုက်သည်။
ရန်ကုန်မြို့ ရွှေဂုံတိုင်ရှိ တော်ဝင်နှင်းဆီစားသောက်ဆိုင်၌ ,ယနေ့ ကျင်းပပြုလုပ်သည့် “လွှတ်တော်ကိုယ်စားလှယ်အဖြစ်မှ ရုပ်သိမ်းပိုင်ခွင့် မကျင့်သုံးနိုင်သေးတာဟာ ပြည်သူ့အခွင့်အရေး ချိုးဖောက်ခံနေရတာလား” ဆိုသည့် ဆွေးနွေးပွဲတွင် ထိုသို့ ပြောခြင်းဖြစ်သည်။
'ဒီဥပဒေဟာ ပြီးခဲ့တဲ့ လွှတ်တော်အစည်းအဝေးကတည်းက ပြင်ဆင်ဆောင်ရွက်ခဲ့တာဖြစ်ပါတယ်။ မပြီးစီးခဲ့ပါဘူး။ ဒီဟာက ပြည်သူတွေရဲ့အခွင့်အရေးအတွက် ပြဋ္ဌာန်းသင့်ပါတယ်'ဟု ရသေ့တောင်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါ်ခင်စောဝေက ပြောသည်။
ထိူ့ပြင် ယင်းဥပဒေနှင့်ပတ်သက်ပြီး ပြည်သူတို့၏ အခွင့်အရေးတစ်ရပ် ဆုံးရှုံးနိုင်ခြင်းမျိုး ဖြစ်နိုင်သောကြောင့် ပြဋ္ဌာန်းသင့်ကြောင်း အမျိုးသားလွှတ်တော်ကိုယ်စားလှယ် ဦးအောင်သင်းက ပြောသည်။
"ဖွဲ့စည်းပုံအခြေခံဥပဒေရဲ့အားနည်းချက်အရ ကိုယ်စားလှယ်ရုပ်သိမ်းခြင်းဆိုင်ရာ ဥပဒေကို ပြဋ္ဌာန်းဖို့ခက်တယ်။ ပြည်သူတွေရဲ့လိုအပ်ချက်ဖြစ်လို့လည်း ပြဋ္ဌာန်းသင့်ပါတယ်"ဟု ၄င်းက ဆိုသည်။
လွှတ်တော်ကိုယ်စားလှယ်အဖြစ်မှ ရုပ်သိမ်းခြင်းဆိုင်ရာ ဥပဒေကို ပထမအကြိမ် လွှတ်တော်တွင် ပြဋ္ဌာန်းနိုင်ရန် ကြိုးပမ်းခဲ့သော်လည်း ပြင်ဆင်နိုင်ခြင်း မရှိခဲ့ပေ။
"ကျွန်တော်တို့ ၂၀၁၅ရွေးကောက်ပွဲမှာ လူကိုမကြည့်ဘဲ ပါတီကိုကြည့်ပြီး မဲပေးပါလို့ပြောခဲ့တဲ့အခါ လူပုဂ္ဂိုလ်ဆိုင်ရာ အရည်အသွေးတွေ ဆန်းစစ်နိုင်ဖို့ အချိန်လည်းမရှိခဲ့ဘူး အားလည်းနည်းခဲ့တယ်။ အဲဒီတော့ ဒီအခြေနေမျိုးမှာ right to recall ဥပဒေကို အမြန်ဆုံးလွှတ်တော်မှာ ဆွေးနွေးနိုင်ဖို့ လိုအပ်တယ်။"ဟု မြန်မာ့နိုင်ငံရေး လေ့လာသုံးသပ်သူ ဒေါက်တာရန်မျိုးသိမ်းက ပြောသည်။
ဖူးပွင့်သူ
