သင့်အသံကို မလှချင် မကောင်းချင်ပါနဲ့..

ဒီခေါင်းစဉ်က သင့်အတွက်အရမ်း ထူးဆန်းနေလိမ့်မယ်.. သင်တို့ တွေးထင်ထားတဲ့ အရာနဲ့ လုံးဝ ဆန့်ကျင်နေတာကိုး.. ဘာလို့လဲဆိုတော့ ဝါသနာရှင်တိုင်းက မိမိတိုရဲ့အသံကို လှချင် ကောင်းချင် အင်အားကြီးချင် နေကြတာကများတယ်.. သတိရပေးပါ.. ဒါတွေအားလုံးက ပြုလုပ်ယူခြင်းတွေပါပဲ.. သူတို့အားလုံးကပဲ သင့်ရဲ့အသံကို သဘာဝမကျအောင် ဒုက္ခပေးနေတာပါပဲ.

ကျနော် ဆောင်းပါးတွေထဲမှာ အထပ်ထပ်အခါခါ ပြောပြပြီးပါပြီ.. လူတစ်ယောက်ရဲ့ အကောင်းဆုံးအသံ ဟာ ပြုလုပ်ယူခြင်း တုပသီဆိုခြင်း ကင်းစွာနဲ့ ခန္ဓာကိုယ်ရဲ့ သဘာဝအတိုင်း တုန့်ပြန်မှုကြောင့် ထွက်ပေါ်လာတဲ့ ပင်ကိုယ်သံပဲဆိုတာ..

ပြုလုပ်ယူခြင်းကြောင့် သင့်ရဲ့ Vocal Instrument ဟာ သူအလုပ် (Function) ကို လွတ်လပ်စွာ လုပ်ပိုင်ခွင့် မရတော့ ပါဘူး.. သင့်စိတ်အတွေးက ပုံမှန်မဟုတ်တဲ့ ထိန်းကျောင်း ခိုင်းစေမှုတွေကြောင့် Larynx ဘေးတဝိုက်မှာရှိတဲ့ Muscles တွေရယ်.. အထူးသဖြင့် မေးရိုး (Jaw) နဲ့ လျှာ (Tongue) တို့ဟာ Tension တွေဖြစ်ပေါ်လာတယ်.. ဒါဟာ သူတို့အလုပ်ကို လွတ်လပ်စွာ လုပ်ပိုင်ခွင့်မရကြပဲ ခိုင်းစေတဲ့အတိုင်း ပုံဖေါ်နေကြရတဲ့ အတွက်ပဲဖြစ်ပါတယ်..

ဥပမာ အဆိုတော်တစ်ယောက်ရဲ့ အသံကို သိစိတ်ကဖြစ်စေ မသိစိတ်ကဖြစ်စေ တုပသီဆို မိတယ်ဆိုပါတော့.. ဒါဟာ သင့်ရဲ့ ခန္ဓာကိုယ်ထဲကို အခြားသူတစ်ယောက်ရဲ့ Vocal Function တစ်ခု ဝင်ရောက် မောင်းနှင်နေတဲ့ သဘောပါပဲ.. ဒီတော့ မိမိရဲ့ Function ကသဘာဝအတိုင်း လုပ်ပိုင်ခွင့်မရတော့ပဲ ပင်ပန်းကြီးစွာနဲ့ ရုန်းကန်နေရတော့တာပေါ့..

ထို့အတူပဲ အသံကိုလှအောင် ကောင်းအောင် ပြုလုပ်သီဆိုခြင်း ကလည်း အတော်ဒုက္ခပေးပါတယ်.. သင့်စိတ်ထဲမှာတော့ လှတယ် ကောင်းတယ် ထင်နေလိမ့်မယ်.. တကယ်တော့ မဟုတ်ပါဘူး.. သင့် Vocal Instrument ကသဘာဝကျစွာ လွတ်လပ်ပေါ့ပါးစွာ မြည်ပေးရမယ့်အစား သင့်စိတ်အထင်ကို လိုက်လံ ပုံဖေါ် ပေးနေရတာ.. ဒါလည်း ထိန်းချုပ်ခြင်း တမျိုးပါပဲ..

ဒီအကြောင်းတရားတွေကြောင့် သီဆိုခြင်းမှာ အရေးအကြီးဆုံးဖြစ်တဲ့ လေစီးဆင်းမှုနဲ့ လေဖိအားကို အနှောက်အယှက် ဖြစ်စေမယ်.. မေးရိုးနဲ့ လျှာတို့ရဲ့ Tension တွေကြောင့် အသံထွက်တဲ့ စနစ်နဲ့ သွားငြိပြီး စကားလုံးမပီသမှုနဲ့ အမြင့်သံ သီဆိုရာမှာ အခက်အခဲတွေဖြစ်ပေါ်လာစေမှာပါ.. ဒါဟာ ပြုလုပ်ယူခြင်းနဲ့ တုပသီဆိုခြင်း တွေကြောင့် ဖြစ်ပေါ်လာတဲ့ ဆိုးကျိုးတွေ ပါပဲ..

ဒါကြောင့် အသံတစ်ခုရဲ့ အလှတရား ဆိုတာ ပြုလုပ်ယူစရာမလိုပါဘူး.. သင့်မှာရှိတဲ့ ပင်ကိုယ်သံကို ရှာဖွေပြီး ဖွံ့ဖြိုးအောင် ပြုစုပျိုးထောင် ပေးမယ်ဆိုရင် လွတ်လပ်ပေါ့ပါးတဲ့ အကောင်းဆုံးနဲ့ အလှပဆုံးအသံကို ရရှိစေမှာ အသေအချာပါပဲလို့ ပြောကြားရင်း ဒီနေ့အတွက် အဆုံးသတ်ခွင့်ပေးပါဗျာ..

ချစ်ခင်စွာဖြင့်..
အိမ်မင်းထက် (MEBC)